Lax̌a ʔola ƛ̓isəla nala, laʔi Ǧʷaw̓ina n̓iłax̌ M̓əlm̓əlba Kʷikʷ qe gax̌ƛi da bibagʷənsƛe. 

“ʔIkus c̓ək̓aləmi! ʔIxʔakən x̌a gax̌e bagʷənsa,” n̓iki M̓əlm̓əlba Kʷikʷ.

“Ləmənc x̌ʷanałʔidƛ.

Q̓inəmənc ǧʷigilasƛe.

Ləmən səngaʔaƛ x̌ənc ǧʷigilasƛe.

ʔOlak̓alən səngaʔinukʷa!” n̓iki Ǧʷaw̓ina.

“Mac̓ałi da səngaʔinukʷ?” wəƛi M̓əlm̓əlba Kʷikʷ.

“ʔIki da səngaʔinukʷ! Səngida səngaʔinukʷx̌a ǧʷigilasƛe lax̌a ʔiʔax̌əlaʔinē,” n̓iki Ǧʷaw̓ina.

Ləmi M̓əlm̓əlba Kʷikʷ ʔiti q̓aq̓iʔsta.

“Masƛi da ʔiʔax̌əlaʔinēya?” wəƛi lax̌ Ǧʷaw̓ina.

“Dukʷəlaʔəmƛəs le gən ǧʷał k̓at̓i x̌ən sənyanəmi x̌ʷa ǧanuł,” n̓iki Ǧʷaw̓ina.

Ləmi dəxʷəlisi Ǧʷaw̓ina qas le nenakʷa.

Ǧełi Ǧʷaw̓ina ʔiʔax̌əla, k̓ata x̌is sənyanəmi.

We, ləmi gʷał.

ʔOlak̓ali Ǧʷaw̓ina ƛəmqa.

Lax̌a łəns niłidi Ǧʷawina x̌is k̓adəkʷ sənyanəmi lax̌ M̓əlm̓əlba Kʷikʷ.

ʔOla gəlt̓i da k̓adəkʷ sənyanəmi!

Ǧəłi M̓əlm̓əlba Kʷikʷ dukʷəldᶻu x̌a sənyanəmi.

“Lam̓as dukʷəla x̌a ʔiʔax̌inēya, x̌a ʔiʔax̌əlaƛe?” wəƛi Ǧʷaw̓ina.

“E! Ləmən dukʷəla,” woc̓ali M̓əlm̓əlba Kʷikʷ.

Q̓əyudap̓a

1. Masi lagiłes Ǧʷaw̓ina k̓adadᶻu x̌a ʔiʔax̌ʔinē? 

2. Gənsi da ʔiʔax̌ʔinēya lax̌ k̓ateyas Ǧʷawina?

3. Masi lagiłes wosəmałi M̓əlm̓əlba Kʷikʷ le ǧʷałi da nuyəmi?