“Laƛənc lax̌a ƛ̓əmaʔis x̌ʷa nalax̌.

Xac̓aʔisux̌.  

Laƛənc dᶻikaƛ qaʔi da gawiq̓anəm,” n̓iki da ʔUmp.

̓ətəmdi da gəngənanəm x̌is didənc̓əmi.

Dalaxdax̌ʷʔəm x̌aʔis dᶻigayu.

Ləmʔəmxdax̌ʷi dᶻika qaʔi gawiq̓anəmi.

Duxʷwidəxdax̌ʷi lax̌a q̓iq̓uʔs.

Dukʷəlaxdax̌ʷi ƛax̌a q̓adᶻəq lax̌a t̓isem.

Dukʷəlaxdax̌ʷi ƛax̌a q̓iq̓umis bənabudala x̌a t̓it̓isəmi.

Duxʷsistalaxdax̌ʷi, we ləm̓i dukʷəlaxdax̌ʷ x̌a p̓əλənakʷəla m̓əlm̓əlbakʷikʷ.

Dukʷəladax̌ʷi xa p̓əλənakʷəla ǧʷaw̓ina.

Dukʷəladax̌ʷi xa ʔəbəmp X̌awi ǧəlqəla λuwis sasəm.

“Walasux̌ da xac̓əʔisəx̌, wixənc x̌ʷəlt̓i lax̌a ʔigis,” n̓iki da ʔUmp.

“Ǧʷixʔidasm̓ən x̌ʷəlta x̌a ǧʷaw̓ina,” n̓iki da c̓ac̓adaǧəm xʷənukʷ.

“Ǧʷixʔidasm̓ən x̌ʷəlta x̌a x̌awi,” n̓iki da babagʷəm xʷənukʷ.

“Ǧʷixʔidasm̓ən x̌ʷəlta x̌a məlməlba kʷikʷ,” n̓iki da ʔUmp.

“Duxʷwi! Ləmux̌ y̓un̓akʷəla!

ʔOʔəm la k̓iyoxʷwidƛənc x̌ʷəlt̓icu.”q̓ʷaq̓ʷəsoli da gəngənanəmi.

“Wixənc qasəlis qənc le nenakʷa,” n̓iki ʔUmp. 

“ʔIxq̓əsəlaxdənox̌ x̌ʷa nalax̌,” n̓iki da ʔola qəlka gəngənanəm.

“ʔIxq̓əsəlaʔəmx̌daʔən,” n̓iki da ʔUmp.

Q̓əyudap̓a

1. Masi ǧʷigilases sa gəngənanəm λuwis ʔUmp?

2. Mac̓ałi da ʔuǧʷəqała mamaʔumas wəna lax̌a k̓atəmakʷ lax̌ page 7?

3. N̓iła la gax̌ən qus ʔixʔage ǧʷigilas ƛuwus λiλaλola.